જીવન પણ લાગે નાટક કરતું !
જીવન પણ લાગે નાટક કરતું, એકાધિક પાત્રો એ ભજવતું ! ક્યારેક અટવાતું, ક્યારેક ડગમગાતું ક્યારેક સ્થિર રહેતું, ક્યારેક અસ્થિર બનતું ! જીવન પણ લાગે નાટક કરતું ! ક્યારેક ઉતાવળથી દોડી જતું, ક્યારેક પાછળ પડી જતું ! ક્યારેક સન્માન મેળવતું, ક્યારેક અપમાન સહન કરતું ! જીવન પણ લાગે નાટક કરતું ! ક્યારેક ઝરણાંની જેમ શાંત વહેતું, ક્યારેક દરિયાની જેમ અશાંત રહેતું ! નદીના પ્રવાહની જેમ આગળ વધતું, જીવન પણ લાગે નાટક કરતું ! ક્યારેક સુખની છાયામાં બેસતું, ક્યારેક દુઃખમાં ડૂબકી લગાવતું ! ક્યારેક ઈચ્છાઓને પૂર્ણ કરવા મથતું ! જીવન પણ લાગે નાટક કરતું ! પરદા પાછળ રાવણ રહે ને, પરદા આગળ આવે રામ બનીને ! પરદા પાછળ દુશાસન જેવું લાગતું, પરદા આગળ ખુદને કૃષ્ણ કહેતું ! જીવન પણ લાગે નાટક કરતું ! ક્યારેક પહાડોની જેમ અડીખમ ઉભું રહેતું, ક્યારેક વૃક્ષની ડાળની જેમ ડોલતું ! આ જીવન પણ લાગે નાટક કરતું, એકથી વધારે પાત્રો એ ભજવતું ! જીવન પણ લાગે નાટક કરતું ! અંતે આ પરદો પડી જશે, પાત્રો ચોમેર ફેલાઈ જશે, અને નાટક પૂર્ણ થશે ! ~ યાજ્ઞિક રાવલ ✍🏻
